నాకొద్దిక్కడ మరో జన్మ

నాకొద్దిక్కడ మరో జన్మ

అంతిమ యాత్రలో సైతం వదలని నా

కుల మతాల నీడలతో కనీసం విహార యాత్ర కూడా చేయలేను!

బతకడానికి కూడా పనికిరాని కులమతాల కవచ

కుండలాలు నాకెందుకు?

ఇంతకీ కులమతాల వేటకుక్కల్ని నా మీదకు

ఉసిగొలిపిందెవరు?

ఎవడ్రా ఇది జ్ఞానభూమి అంది!

అజ్ఞాన సముద్రంలో నిత్యం నెత్తుటి స్నానాలు!

నా తలరాతా? గీతా? ఏ మసక కళ్ళద్దాలతో చూడాలి నేను?

అలసత్వ ప్రవచనాల జ్ఞాన నేత్రాల్లోంచి చూడాలా?

ఎలా చూడాలీ అసంకల్పిత అనూహ్య మరణ శాసనాలు?

కుల మతాలు నాకేమీ ఆధార బంధాలు కావు!

అవేమీ అమ్మా నాన్నలు నాకిచ్చిన బహుమతులు కావు!

బతుకునే బలి తీసుకున్న విష బిందువులు!

***

ఒరేయ్! సకల చరాచర జీవరాసులు తిండి కోసమే కొట్టుకు ఛస్తాయ్!

జంతువైనా మరో జంతువుని వేటాడేది తిండి కోసమే కదరా!

చీమ చీమని చంపదు!

పులి మరో పులిని చంపదు!

సింహం మరో సింహాన్ని చంపదు!

నక్క మరో నక్కని చంపదు!

మరి నువ్వేంట్రా మానవ మృగంలా మనుషుల్నివేటాడతావ్?

మనిషిని మనిషెందుకురా వేటాడాలి?

ఏ చదువులు చెప్పాయి నీకు?

ఏ గురువు చెప్పాడు నీకు?

బస్సుల్లో, రైళ్ళల్లో, విమానాల్లో భూతల స్వర్గం చూడాలని వెళ్ళి

మనిషంత పెట్టెల్లో ఇంటికొచ్చార్రా!

ఎవరిదీ పాపం?

***

నువ్వే తుపాకీ కనిపెట్టి నువ్వే కులమతాలు కనిపెట్టి

నువ్వే పుస్తకాలు రాసుకుని నువ్వే కాల్చుకుని

స్మశాన దేశంలో మరణగీతాలాలపిస్తావా?

జంతువుల్లో మంచి జంతువు మనిషని

జంతువులు కూడా అనుకునే అవకాశం లేకుండా చేశావు కదరా? జంతువులిప్పుడు సిగ్గుపడుతున్నాయ్!

వీధి కుక్కలు విస్తుపోతున్నాయ్!

ఒక గుంపు అడవుల్లో దూరి మనుషుల్ని వేటాడుతుంది

మరో గుంపు అడవుల్లోంచి వచ్చి మనుషుల్ని

వేటాడుతుంది!

మనుషులేకదరా అందరూ!

మనిషిని చంపడానికి మనిషెందుకురా?

ఒకడు కులం తుపాకీతో మనిషికి గురి పెడతాడు

ఒకడు మతం తుపాకీతో మనిషికి గురి పెడతాడు

ఒకడు కరెన్సీ తుపాకీతో మనిషికి గురి పెడతాడు

మనిషికి మనిషి గురి పెట్టడానికి

ఎన్నెన్ని ఆయుధాలో!

***

అక్షరమంటే మనిషి కదా!

ఇదేమిటీ అక్షరం శవం కంపు కొడుతోంది!

ఈ అక్షరం మనిషి వాసనెయ్యాలి కదరా!

ఈ అక్షరాన్ని కప్పుకున్న కవిత్వం మనిషితనంతో

పరిమళించాలి కదరా!

ఈ అక్షర కవిత్వం చావు వాసనొస్తోందంటే

ఇక మనిషెక్కడరా?

ఈ కవిత్వం చావు వాసనొస్తోందంటే మనిషితనం

మరణించినట్టే కదరా!

ఏది ఏమైనా ఒరేయ్ దేవుడూ!

కుల మతాలే జ్ఞాన బీజాలుగా, సన్నాసులైనా,

సన్యాసులైనా

ఎన్ని అవతారాలెత్తినా కరెన్సీ కోసమే

పరుగెత్తాలని శ్వాసిస్తూ శాసిస్తూ

బుద్ధుడి బోధల్ని తిరగరాసిన ఈ దేశంలో

మాత్రం మళ్ళీ పుట్టించకు దేవుడా!

మనిషిగా మరో జన్మ తప్పదంటే కులమతాల్లేని

దేశంలో పుట్టేలా అనుగ్రహించు!

నీవల్ల కాదంటే పురిట్లోనే చంపెయ్!

-చల్లా రామ ఫణి

9247431892

25.04.2025

చిత్రం: ప్రముఖ కార్టూనిస్ట్ శ్రీ మృత్యుంజయ్ సౌజన్యంతో...

For Me, No Another Birth Here please!

                              For Me, No Another Birth Here please!

Even on my final journey,
I can’t take a leisurely stroll
because of the shadows of caste and religion
that refuse to leave me!
What use are these armours of caste and creed
that are no good even for survival?
Who unleashed these bloodhounds
of caste and religion upon me?

Who claimed this is the land of wisdom?
Daily blood baths in an ocean of ignorance!
Is it my fate? My destiny?
With what blurred lens should I view it?
Should I see it through the tired eyes
of slothful sermons?
How should I understand these
unforeseen, unchosen death sentences?

Caste and religion are no bonds for me—
no gifts passed down from my parents.
They are venomous drops
that have claimed life itself.

---

Hey! All creatures fight only for food!
Even wild beasts hunt each other
only to feed!
An ant doesn’t kill another ant.
A tiger doesn’t kill another tiger.
A lion doesn’t kill another lion.
A jackal doesn’t kill another jackal.

Then why, oh why, do you,
a human beast, hunt fellow humans?
Why must man hunt man?
What education taught you this?
Which teacher instilled this in you?

People set out in buses, trains, planes
seeking a heaven on Earth—
only to return home
packed in coffins.
Whose sin is this?

---

You invented guns,
then created caste and religion.
You wrote the books,
burned them yourself,
and now sing death dirges
in this cremation ground of a nation.

They used to say humans are
the noblest among creatures—
you’ve destroyed even that belief.
Now animals are ashamed.
Even stray dogs are shocked.

One group hunts humans deep in forests.
Another group comes out of forests
to hunt humans.
But aren’t they all people?

Why must man kill man?

One targets a human
with the gun of caste.
Another aims
with the gun of religion.
Yet another with
the gun of currency.

How many weapons
has man forged to kill man?

---

Isn’t a letter, a word, a symbol—human?
Then why does this letter smell like a corpse?
Shouldn’t words carry the scent of humanity?
Shouldn’t poetry wrapped in these letters
radiate humanness?

If poetry starts smelling of death,
then where is the human left?
If poetry reeks of death,
doesn’t it mean humanity has died?

Whatever it is, hey God—
If caste and religion are your seeds of wisdom,
if all sages and saints,
no matter what avatars they take,
only run after currency—
Then in this land that rewrote even the teachings of Buddha,
please, don’t give me another birth!

If I must be born a human again,
let it be in a land free of caste and religion.
And if even that is not possible—
then kill me in the womb.

 

– Challa Rama Phani
Phone: 9247431892
Date: 25.04.2025

విప్లవ 'మాత్ర' - వైకుంఠ యాత్ర

You can see this poetic political comment on www.5amnews.com

యాత్రలిచ్చు ఓదార్పు
యాత్రలిచ్చు ఓర్పు!
రాజకీయమెంతో నేర్పు!
పదవులు పట్టే నేర్పు!

* * *
ఆమోదం పొందదేల నా రాజీనామా!
పొందకుంటే పదవికదే పెద్ద వీలునామా!
రాజీనామా చెయ్ ! రోడ్డు మీద రచ్చ చెయ్!
పదవి పట్టి వేళ్ళాడుతూ ఉద్యమాల 'ఉచ్చు'వెయ్!

* * *
అవినీతికి విత్తనం నేటి రాజకీయం!
జనంపైన పెత్తనం నేటి రాజకీయం!
కలివిడిగా ఉంటే కాదట అది ప్రగతి!
విడిపోతే పడిపోతే అది 'వారికి' పురోగతి!

* * *
యముని మహిషపు లోహఘంట కాదోయి ఉద్యమం
'భజన' 'విభజన' కాదోయ్ జనం కోరే ఉద్యమం!
నీ పదవికి హామీలు ఇవ్వదోయ్ ఉద్యమం!
విజ్ఞతకు, త్యాగానికి చిరునామా ఉద్యమం!

* * *
'చిరు' జట్టుతో నిలిచేనా నీతిలేని ప్రభుత!
చిరుగాలికి ఆరునా పెను కాంగ్రెస్ ఘనత!
వేయి గొడ్లు తిన్నాక పెద్ద రాబందు -
కథ కూడా బందుకదా 'జనమే' కామందు!

* * *

హజారే... అవినీతికి బేజారే!

అవినీతిని చెండాడే ఒకే ఒక్క యోధుడు!
జనావళిని ప్రభావితం చేసిన తాజా వీరుడు!
వృద్ధాప్యానికి సైతం వన్నె తెచ్చిన కుర్రాడు!
సర్కారుకు ముచ్చెమటలు పట్టించెను చూడు!
ఉరకలెత్తి వచ్చె చూడు మలి ఉద్యమ సూరీడు!
మహోద్యమం మహోదయం ఇక తప్పదు నేడు!

*గంగలో మునగంగ...!

మునిగాను!
దేహంలోకి దేశం ప్రవహించింది!
వెలిగాను!

* * *

గంగైతేనేం! గోదావరైతేనేం!
పోరాటమంతా కాలుష్య నిర్మూలన కోసం!

* * *
గంగలా మనసు!
కాలుష్యంలా ఆలోచన!

* * *

మునగకముందు - భావ దారిద్ర్యం!
మునిగాక - భావ రాహిత్యం!

* * *
ఎన్ని తరాలు నీలో మునకలేశాయో గంగా!
కడుపులో కాలుష్యం - కంటినిండా బెంగ!!

* * *

జీవన ప్రవాహం గంగలా ...
బతుకు తెల్లారిందన్న బెంగలా...!

* * *

నింగినుండి దూకింది! కాళ్ళు విరిగుంటాయి!
చీకటి చీర చుట్టుకుని చతికిలబడింది!

* * *

దూకి ప్రవాహమయ్యావు నువ్వు!
బతుకు చితిలో దూకి ప్రమాదమయ్యాను నేను!

* * *

గంగ వూయల ఒడిలో వూగే శవం!
బతుకు వశం కాని 'పర'వశం!!

* * *

శవంతోపాటు ఆమె కన్నీరు తేలుతోంది!
గంగమీద తెట్టుకట్టిన నూనెలా!!

* * *

వొడ్డున గంగ భజన, ధనార్జన...
పాపాలు కడిగే 'గంగ' పనిలో పండా నయవంచన!

* * *

పడవకు తెడ్డు వేశాడు!
అబ్బో! వాడు గంగకే అడ్డేశాడు!
జీవితాలను తీరం చేర్చాడు!

* * *

గతానికి సాక్ష్యం!
వర్తమానంలో కాలుష్యం!
భవిష్యత్తులో శూన్యం!

* * *

దండకారణ్యమధ్యంలాంటి జీవితంలో
బతుకు అక్షరం కావడం పాపం!
పోరాటం కాకపోవడం నేరం!

* * *

గంగ ఒక్కటే - ప్రవాహాలు వేరు!
బతుకు ఒక్కటే - అహంకారాలు వేరు!!


కవిత్వమంటే వూహ కాదు!
అక్షరానికి అర్ధరాత్రి పుట్టిన ఈహ!!

* * *

గంగ వైపు నడక నీతి...
గత వైభవాల వెనక పడక...భీతి..!

* * *

గంగ ముందుకి - భావి తరాల్లోకి....
నేను వెనక్కి - మునక తప్ప గంగ తీర్ధం నోట్లో వేసుకోలేక -
వేదనతో తడిసిన వొంటితో ఇంటికి..!

(*ఆ మధ్య Kanpur వెళ్ళి గంగలో మునిగాక పొంగిన అక్షర 'గంగ'!)

ఊహ

మిమ్మల్ని నేను హింస పెడుతున్నానన్న స్పృహ ఊహేమో!
అంతర్జాలంలో కవిత్వం తప్పించుకోలేని అక్షరాయుధం !

పోగు

చంద్రుడు దిగంబరుడు !
నూలు పోగుల కోసం ఎన్ని యుగాలుగా
వెయిట్ చేస్తున్నాడో !